My Session in CAT Scope 11

Posted on Wednesday, May 12, 2010. Filed under: CAT, My Life | Tags: , , |

السلام عليكم ورحمة الله و بركاته

النهاردة كانت أول سيشن ليا أديها في سكوب لأسرة الكات

عنوان السيشن كان Unit Testing

تقدروا تنزلوها من هنا:

Unit Testing Presentation

ياريت رأي الناس اللي حضرت السيشن بكل صراحة

ولو حد عنده أي ملاحظات مش عايز يقولها هنا ممكن يقولهالي ع الميل

fci_boody@yahoo.com

بس لازم أعرف رأي كل زوار بلوجي اللي حضروا

عشان أحاول أصلح اخطائي بعد كدا

شكرا مقدما

السلام عليكم 🙂

Read Full Post | Make a Comment ( 11 so far )

CAT Scope 11

Posted on Saturday, May 8, 2010. Filed under: CAT | Tags: , |

كات سكوب هو مؤتمر يحدث على مدار ثلاث أو أربع أيام و ينظمه فريق الكات, و فى هذا المؤتمر يعطى مهندسين ذو خبرة و محبى أنظمة المعلومات محاضرات تقنية تركز على الIT عامةً و علوم الحاسب و بعضها عن تنمية المهارات الشخصية .

يعتبر كات سكوب تجمع العقول الذكية و النبيهه فى مصر. تتنوع المحاضرات ما بين مستوى المبتدئين الى المحترفين لإتاحة فرصة الإستفادة للجميع, حيث قد تلقى بعض هذه المحاضرات نظرة عامة على تكنولوجيا جديدة أو محاضرة/ورشة عمل متعمقة.

ابتداءً من 12 و حتى 16 مايو 2010 سوف يقام مؤتمر كات سكوب 11, فى قاعة رشاد البدراوى بكلية هندسة, جامعة المنصورة. تحقق من الصفحة الخاصة  بالمحاضرون للتعرف أكثر على الحدث

يمكنك استعراض الجدول للتعرف علي الندوات

تعرف اكثر علي الحدث و المحاضرين و الجوائز وكيفية المساعدة من

http://catreloaded.net/scope/

Read Full Post | Make a Comment ( 6 so far )

CAT

Posted on Sunday, April 26, 2009. Filed under: CAT, My Life | Tags: , , , , |

السلام عليكم و رحمة الله و بركاته

النهاردة هتكلم في موضوع كان نفسي أتكللم فيه من زمان

بس حبيت يبقى في مناسبة عشان أتكللم في الموضوع الشيق ده

الموضوع ده غير ناس كتير … و من ضمن الناس دي “أنا”

و أكيد من ضمنهم ناس هيقرأوا البوست ده

عنوان الموضوع … زي مانتوا شايفين فوق

CAT

كات هوا اختصار

Computer Assistance Team

و ده على رأي “إيفان” صاحبي … “أجعص جروب آي تي في كلية الهندسة جامعة المنصورة”

😆

المهم …. أنا ايه اللي خلاني أكتب البوست ده دلوقتي؟

بصراحة أنا بقالي فترة مستني اليوم ده عشان أشوف تطوراتي من ساعتها

من ساعة ايه؟؟

من ساعة ما عرفت الـ CAT

و كان بتاريخ 22 – 4 – 2007 … و ده كان أول يوم في

Scope 6

cat-scope-6

أول معرفتي بـ “كات” كان من كلام واحد صاحبي “حسن ابراهيم” … و كانت أول سيشن أحضرها هي سيشن:

Design Talk “2” … by “Ahmed Ali”

(و بصراحة دي السيشن الوحيدة اللي حضرتها في السكوب)

أظن الناس اللي عارفين الكات و عارفين أحمد علي … عرفوا أنا ليه حبيت كات 😀

أحمد علي كان من الناس اللي حببوني في الجرافيكس … و كل سيشن أحضرهاله بيبهرني بحاجة جديدة -ماشاء الله عليه- 🙂

المهم نرجع لموضوعنا … أنا ليه ماعملتش البوست ده يوم 22؟؟؟

عشان 26 – 4 – 2007 ده كان يوم اتخاذ قراري اني أشارك في كات

أشارك بإيه؟؟ باني أحضر السكوب الجاي كله … و مافوتش ولا سيشن

😆

الواحد كان على أد نياته بقى أياميها!! 😀

المهم … اتخذت القرار فعلا … و حضرت السكوب اللي بعده كله

Scope 7

و كان بتاريخ 23 – 10 – 2007

و ده كان نقطة التحول في حياتي 🙂

من أول هنا بقى … و أنا بدأت أغير اسلوب تفكيري … و أغير وجهة نظري للمجال بتاعي

و من ساعتها و أنا بقول اني مش ديزاينر … أنا بس بحب الديزاين

و اشتركت في “بيكسي كات” في يوم 25 – 10 – 2007 بس ماكنتش اشتغلت تقريبا

و من بعدها عرفت اللينوكس و أخدت كورس مع “أيمن طاهر” … و كان هوا الـ

CAT Coordinator

ساعتها … و بجد كان أكتر واحد شجعني اني أدخل الكات و أشارك و لو في مشكلة مقابلاني أقول عليها و كده

و بدأت المشاركة فعليا في

Scope 8

cat-scope-8و السكوب ده كان بتاريخ 10 – 3 – 2008

مشاركتي في السكوب ده مكانتش بديزاينات و كده … مشاركتي كانت في الـ

Marketing

سكوب 8 ده طلع من أنجح السكوبز اللي اتعملت لحد دلوقتي … و بفضل ربنا قدرنا نعمل دعاية ماعرفناش نعمل زيها تاني

و احنا لحد دلوقتي بنحلف بالسكوب ده و بالحضور اللي فيه … و خصوصا الحضور اللي كان في سيشن “أحمد سليمان”

المهم احنا نفسنا كنا منبهرين بالحضور … و كمية الناس اللي حضروا من عندنا من حاسبات كانوا كتير (تقريبا ثلث الحضور)

و من ساعتها و في ناس كتير من حاسبات بتلتزم بحضور السكوبز اللي بعد كده

و السكوب ده كان في آخر عهد “أيمن طاهر” كـ

Coordinator

و اللي اخد اللقب بعده كان “السيد جمال”

اما بالنسبة للتحول من سكوب 8 ل سكوب 9

من هنا بقى بدأت مشاركة بكل حاجة أعرفها … سواء جرافيكس في بيكسي كات أو برمجة أو لينوكس في هاكرز

و الحمد لله أكبر فترة استفادة ليا كانت مابين سكوب 8 لحد دلوقتي …

بعد كده كان

Scope 9

https://b89dy.wordpress.com/2008/10/27/cat-scope-9-be-there/

Scope-9و ده كان بتاريخ 28 – 10 – 2008

في السكوب ده … حسيت اني واحد من اللي شايلين السكوب فعلا

و حسيت ان انا و صحابي عملنا مجهود كويس نسبيا … 🙂

و كان في بنات من الكلية عندنا بدأوا يشاركوا و فيهم ناس بدأت توزع فلايرز على البنات و كده …

حسيت اننا فعلا عملنا فيه شغل كويس

مع ان السكوب ده كان قابلنا فيه مشاكل كتيرة … بس الحمد لله عملنا اللي علينا و السكوب مشي كويس 🙂 …

هوا اه كنا متخيلين اكتر من كده … بس الوقت كان ضيق جدا و اتزنقنا في كذا حاجة و بالتالي الدعاية اتأخرت شوية … عشان كده الحضور مكانش زي سكوب 8

و من بعد السكوب ده و أنا طورت نفسي في شوية حاجات زي البرمجة مثلا

بدأت أتعلم “بايثون” و دست فيها شوية كويسين … و كانت بداية كويسة جدا جدا لعالم البرمجة

و بعدها بدأت أنا و تيم البرمجة اللي معايا في الدفعة نتعلم “جافا” و لسه شغالين بيها لحد دلوقتي

و دلوقتي آخر سكوب اتعمل كان

Scope 10

كان بتاريخ 21 – 3 – 2009

https://b89dy.wordpress.com/2009/03/20/scope-10/

مشاركتي في السكوب ده كانت في محاولات للديزاين

و في تقديم تاني يوم في السكوب

و السكوب الحمد لله كان ناجح جدا … يعني مابين سكوب 8 و 9 كده

و مشاركتي في كات بقى كانت بمشاركتي في ديزاينات تبع بيكسي كات … و في مشاريع زي مشروع “فكرة”تبع هاكرز

و شوية حاجات تانية بسيطة 🙂

أنا عامل البوست ده أصلا عشان أسجل تطوراتي في السنتين دول

و بجد أنا مش حاسس انهم سنتين أصلا 🙂 .. أنا حاسس انهم كتيييييير!! 😀

حاسس اني اتقدمت كتير بفضل ربنا و بمساعدة ناس كتير 🙂

ناس زي “أحمد الجميل” و “أيمن طاهر” و “أحمد سليمان” و “السيد جمال” و “إبراهيم عبدالفتاح

و ابراهيم بالذات ممكن ماكونش اتعاملت معاه كتير في مجال التكنولوجيا و كده … بس بستمتع جدا بالسيشنز اللي بيعملها مهما كانت مش في مجال دراستي

و ناس بقى زي “محمد صفوت” و “كريم الله” و الهاكرز عموما 🙂 … بحب اتناقش معاهم عشان بيفيدوني كتير!!

و ناس في مجال الجرافيكس زي “أحمد فؤاد” و “حسانين محمد” و “رامي المرسي” و “إيفان (أو أحمد منير)”

و البنات اللي فادوني زي “هنادي موسى” و “رميساء محمد” و “مروة” و “مريم عصفور” و “سارة جمعة

و ناس تبعنا في الكلية …

طبعا مش هقول صحابي المعروفين 😀 … دول اللي بيشجعوني اصلا 🙂

بس في ناس كتير غيرهم فادوني … و في معيدين -ربنا يكرمهم يارب- مابيتأخروش علينا بأي حاجة

و في بنات كمان اتعاملت معاهم مفيدين جدا جدا

و صحابي اللي اكبر مني و الناس دي كلها …

بجد بشكر كل واحد من دول مهما كان

و طبعا شكر خااااااااااااااااااص جدااااااااااااااا لكل عضو من أعضاء 513!!

و أنا أكيد نسيت حد … عشان انتوا عارفين الزهايمر بقى … 😀 … فمحدش يزعل بقى!! 🙂

المهم … في آخر البوست بتاعي …

أحب أهنئ كل واحد وصل لنهاية البوست 😆

و أشكره طبعا عشان استحمل كل كلامي اللي فوق ده ووصل لحد هنا!! 😀

و أتمنى اني قدرت أفيد أي حد في السنتين اللي فاتوا دول 🙂

في أي مجال أو في أي طلب ولا حاجة 🙂

هحاول أفتكر أعمل بوست زي ده كمان سنة -ان شاء الله- ان كان لينا عمر 😀

سلااااااااام!!

Read Full Post | Make a Comment ( 19 so far )

يوم من أيام الاسكوب

Posted on Sunday, March 22, 2009. Filed under: CAT | Tags: , |

السلام عليكم

النهاردة كان تاني يوم في كات سكوب 10

و انا اللي كنت بقدم السيشنز النهاردة 🙂

اليوم بدأ معايا بداية غريبة  … صحيت من النوم الصبح .. قعدت على الجهاز … بدور على أي حد ممكن يجيبلي أي معلومة عن السيشنز بتاعت اليوم ده في السكوب

اتصلت بأحمد الجميل طبعا 😀 … ربنا يكرمه هوا اللي أنقذني

أخدت منه المعلومات اللي أنا عاوزها

و رحت الاسكوب بدري نص ساعة عشان اعرف ايه النظام و مبقاش متوتر ولا حاجة

الساعة 10:30 … مسكت المايك … و فتحت السلايدز اللي فيها السيشنز بتاعت اليوم (اللي هيا اصلا تعديل في سلايدز محمد صفوت)

و بدأت أتكلم عن اليوم عامة ..

طبعا كنت متوتر شوية في الأول … و ده لانها اول مرة اطلع قدام الناس و كده (طلعت مرة واحدة قبل كده بس كانت تدريب اصلا)

المهم كملت يومي في تقديم السيشنز … بس للأسف الناس كانت بدأت تنام في الآخر

بس بجد استفدت جامد جدا بإني كل شوية أقدم سيشن و أروح أشوف الفيدباك بتاع الناس و أي نصايح عشان اعرف اظبط الموضوع شوية

الحمد لله جيت على آخر اليوم … التوتر تقريبا كان اختفى … بس الصوت بتاع المايك كمان اختفى معاه 😀

و أنا صوتي مش عالي … فـ “السيد جمال” دخل يتكلم بدالي عشان كان عارف اني تعبت جدا في اليوم ده

و ان شاء الله انا ناوي دلوقتي اتعالج على نفقة الكات! 😛

الحمد لله اليوم خلص على خير

ان شاء الله الموضوع ده هيفيدني جامد جدا في السيشن بتاعتي في البيكسي داي 😀

دعواتكم بقى 😀

سلام 🙂

Read Full Post | Make a Comment ( 6 so far )

CAT Scope 10!!

Posted on Friday, March 20, 2009. Filed under: CAT | Tags: , |

CAT Scope?

مؤتمر بنعمله كله ترم عن طريق فريقنا غة كايةهندسة جامعة المنصورة
(CAT)— Computer Assistant Team

مواعيده ايه؟
4 أيام متواصلة بيبدأ الساعه 10 صباحا ويتنهى 4 عصراً
هيكون يوم السبت والأحد والأثنين والثلاثاء الجايين

بيتكلم عن ايه؟

محاضرات تقنية فى مختلف التخصصات بيقدمها أعضاء الفريق بجانب مندوبين عن الشركات الرعاة للحدث وبيقدمو عروض كمان للطلاب

هستفيد ايه؟
كم الاستفادة بيكون هائل انت بتحضر محاضرات تقنية لأحداث التقنيات المستخدمة ممكن تكون مسمعتش عنها كمان تقدر تستفيد من خبرات الناس الى سبقو فى المجال الى انت مهتم بيه وممكن تلاقى حاجات بتدور عنها كمان هتلاقى ناس تساعدك لو انت عايز تتعلم حاجة

طيب المكان فين؟

الاسكوب هيكون فى قاعة رشاد البدراوى كلية الهندسة جامعة المنصورة

ممكن أعرف الجدول؟

اكيد طبعا اهو

ممكن أساعدكم ازاى؟

انك تحاول تنشر الحدث على قد ماتقدر الدال على الخير كفاعله
ده الإيفنت على الفيس بوك ابعته لأصحابك
وممكن تنشر البوست ده فى مواقع او مدونات

الموضوع الأصلي في مدونة هوندا

🙂

أتمنى أكبر عدد يحضر 🙂

Read Full Post | Make a Comment ( 1 so far )

« Previous Entries

Liked it here?
Why not try sites on the blogroll...