Taxi

Posted on Friday, July 10, 2009. Filed under: My Life | Tags: , |

Taxi

السلام عليكم

سواقين التاكسي بقوا حاجة فظيعة في البلد كلها

و التعاملات معاهم بقى حاجة صعبة جدا يعني

لدرجة ان في كتاب اسمه “تاكسي” نزل و المصيبة انه اترجم لـ 7 لغات

و هوا الكتاب الوحيد اللي اتباع منه اكتر من 75000 نسخة في سنة واحدة!!

منكرش ان الموضوع شدني … و قررت اني أقرأ الكتاب

الكتاب فيه 58 قصة … كل قصة منفصلة عن التانية …

في شوية قصص تحزن جدا … و في حاجات مسخرة بجد

الكتاب عجبني لان الكاتب جاب قصص مختلفة و فعلا وانا بقرأ الكتاب حسيت اني راكب التاكسي و الحوار ده بيدور قدامي

———————————————————–

انا طبعا بيحصل معايا مواقف عجيبة مع سواقين التاكسي

يعني كان زماني ألفت كتاب برضه 😛

بس الواحد بيسكت!

آخر موقف كان اول امبارح

ركبت لقيت السواق مشغل أغنية (تقريبا عبدالحليم) و عمال يغني معاه بصوت عالي

و الراجل عايش حياته … مع ان الجو حررررررر جداااا و مش مساعد

المهم قبل ما أوصل المكان اللي هنزل فيه … اديته الأجره بتعته

قالي … لسه جنيه كده

– جنيه ليه ان شاء الله؟؟

الراجل سكت شوية كده …. بتاع 10 ثواني في صمت و بيقوللي:

– يعني مش هتجيب الجنيه يعني؟!

– لأ مش جايبه

( و رسمت على وشي ابتسامة عريضة )

قاللي: – اه .. فأستني يعني؟

– أييييوة فأستك يا باشا 😀

كان الموضوع كله هزار من الأول و كان باين عليه شوية …

انا الحمد لله بقيت اعرف اللي قدامي بيهزر ولا لا بسهولة … 😀

اصل بيبقى في ضحكة مستخبية جواهم كده … بيحاولوا يخبوها … بس عرفت أفئسه (على حد قوله)

الموقف ده عادي جدا بالنسبة لمواقف تانية شفتها … و متخلونيش أحكي عشان منقلبش المواجع 😀 😀

———-

اه بالمناسبة انا لسه مغير الثيم من شوية

يعني متخافوش العنوان صح 😀

سلام 🙂

Read Full Post | Make a Comment ( 13 so far )

ربنا ينتقم منهم …

Posted on Tuesday, June 23, 2009. Filed under: My Life | Tags: , |

يوم جميل جدا!

يبدأ باني مصليتش الفجر ولا نزلت أعمل رياضة زي ماكنت مخطط

و يارتني حتى ارتحت في النوم

صاحي على صوت واحد من الحيوانات اللي بيبقى معاهم موتسكلات و مشغلين أغاني على أعلى صوت

و سعادته واقف بالموتسكل بتاعه اللي ابوه جايبهوله و بيتمنظر بيه

و عمال يكلم صاحبه في الشارع … و مش هاين عليه يوطي الصوت

و ياريته حتى مشغل حاجة عدلة …. و حتى لو مش حاجة عدله … ياريته ثابت على أغنية واحدة

لأ عمال يقلب بين الأغاني المعفنة اللي زيه

لغاية ما لستة الأغاني خلصت و عادها من الأول

و طبعا أنا مستمتع جدا وانا بسمع بدايات الأغاني الهابطة دي

قمت من النوم مصدع و مش طايق حيوانات المتسكلات … ربنا ينتقم منهم جميعا

——————————————————————————————————————-

المهم خلاص شلت الموضوع من دماغي و نزلت أصلي الضهر

صليت و رحت جبت حاجات للبيت

و شايل حوالي 12 كيلو كده ولا حاجة

جيت لقيت الأصنصير واقف في الدور السادس!

أخبط عشان يقفلوا أم الباب … مفيش

أزعق .. برضه مفيش

قلت يبقى أكيد هوا عطلان و مش هيشتغل دلوقتي

طلعت على السلم و انا بقاوم كل الاحوال الجوية و النفسية

وانا في الدور الخامس علوي .. و في دورين تحت للمطعم اللي تحتنا … يعني نعتبر في السابع

راجع مش طايق الحر بقى و كده

شوية و طلعت اشوف ايه موضوع الأصنصير ده لقيتهم كانوا فاتحين الباب – كالعادة – و مستنيين يجيبوا حاجة من فوق و ينزلوا

والله الواحد كان دايما يقول ندعيلهم و نقول ربنا يهديهم

بس خلاص انا جبت أخري من الحاجات اللي -للأسف- تعتبر نوع من أنواع البني آدمين

و ربنا ياخدهم و ياخد كل ظالم زيهم

Read Full Post | Make a Comment ( 10 so far )

swe night

Posted on Sunday, May 31, 2009. Filed under: My Life | Tags: , , |

امبارح بالليل … في وقت متأخر شوية

ماكنتش قادر أجمّع أي حاجة و مش مركز خالص

و دي كانت النتيجة

|

|

\/

SWE night

دي كانت نهايتي مع مذاكرة الـ

Software Engineering

اه .. معلش الخط وحش بقى بس عموما زي مانتو شايفين أنا خطي أحسن على الكمبيوتر

Read Full Post | Make a Comment ( 20 so far )

Cube Solved :D

Posted on Tuesday, May 19, 2009. Filed under: favorites, My Life | Tags: , |

بعيدا عن ان الساعة بقت 4 و ربع … و الواحد خلاص بيشطب و عايز ينام بأي طريقة عشان عندي معاد الساعة 11 الصمح …

بعيدا عن المذاكرة و الكلام الفاضي اللي مابينفعناش بأي حاجة ده …


انا فرحااااااااااان جداااااااااااااااااااااااااا


انا خللللللللللللصصصصصصصصصصصصصصصت

cube solved

بالاستعانة بفيديو

بجد الواحد اتبهدل على ما عرف يفك الألجورذم بتاعها

و ده تالت بوست أكتبه للعبة دي … بس بجد الواحد لو يقدر يعملها بلوج مخصوص يبقى شيء ممتع جدا 😀

بفكر أعملها مشروع تخرج 😆

Read Full Post | Make a Comment ( 7 so far )

book.open()

Posted on Saturday, May 16, 2009. Filed under: My Life | Tags: , , |

السلام عليكم

النهاردة صحيت من النوم لقيت نفسي فايق كده و في مود الـ (لا مؤاخذة) ـمذاكرة

فقررت اني هبدأ النهاردة بقى

و دي بصراحة لحظة من اللحظات التاريخية و المفروض تتسجل في موسوعتي الخاصة

و هيا اني هبدأ مذاكرة قبل الامتحانات بأسبوووووووووووع بحااااااااااااااله!!!!!!!!!!

ربنا يكون في عونا ان شاء الله

سلام

🙂

Read Full Post | Make a Comment ( 16 so far )

« Previous Entries

Liked it here?
Why not try sites on the blogroll...