النتيجة

Posted on Wednesday, July 21, 2010. Filed under: My Life | Tags: , , , |

السلام عليكم ورحمة الله و بركاته

زي مانتوا شايفين العنوان .. النتيجة ظهرت النهاردة و الحمد لله 😀

و احب اعلن من موقعي هذا اني اتخرجت

اي والله اتخرجت 😀

وجبت جيد كمان

مش بس كدا

و جبت امتياز في مشروع التخرج 😀

الحمد لله اننا وصلنا لليوم دا 😀

انا عايز اقولكوا ان اول حاجة عملتها بعد ما عرفت النتيجة و اطمنت على صحابي هيا اني غيرت حالتي في الـ C.V

من طالب لخريج جايب امتياز في مشروع التخرج 😀

حاسس بفرحة كبيرة و راحة نفسية كمان و الحمد لله 🙂

يارب كدا عقبال ما اخد اعفاء من الجيش … وانتوا كمان يارب … سواء شباب او بنات كمان اهو 😀

ربنا يوفقنا جميعا 🙂

البوست دا هيفضل ذكرى للتخرج … فاللي عايز يكتب اللي ف نفسه يكتب 😀

سلام 🙂

Read Full Post | Make a Comment ( 8 so far )

صباح النتيجة …

Posted on Thursday, July 2, 2009. Filed under: My Life | Tags: , |

-قايم من النوم على صوت أمي و هيا بتقولي:

-“قوم يا عبدالله عشان اختك بتقول نتيجتكو ظهرت اهه”

-ماشي بس ثواني و هقوم اهو

– قوم يابني وابقى نام تاني بعد ما تشوفها

– لازم اشوفها يعني؟!

– انت دمك بارد اوي من ناحية النتيجة كده ليه

– ……….

طبعا بعد التفكير الطويل … قررت اني اجيب النتيجة

-خلاص هقوم أجيبها اهو

و قمت فعلا و اخدت الكارنيه بتاعي عشان مش حافظ الآي دي

و دخلت من شارع الاستبيان كده و رايح على النتيجة

لقيت يافطة بتقول

“تم حجب النتيجة لعدم سداد رسوم امتحان مواد التخلف”

انا طبعا:

– الله يحرقكم و يحرق النتيجة في يوم واحد

أمي:

– طيب هتعمل ايه يابني مفيش حل للموضوع ده؟

– الحل الوحيد اني انزل الكلية و اروح اقلبلهم الدنيا عشان انا دفعت الرسوم اللي بيقولوا عليها دي بس هما بيستهبلوا!

-خلاص معلش يابني روح و لما ترجع ابقى نام برحتك … أهم حاجة تطمنا عليك

(في الكلية)

انا: السلام عليكم

أ/أمنية + أ/أشرف: و عليكم السلام

انا: انا عندي سؤال بس ..

(اديته الكارنيه بتاعي و بدأت كلام)

هوا مش ده كارنيه الكلية برضه؟

أ/أشرف: اه ايه المشكلة؟

انا: يعني مش أنا اللي مزوره ولا حاجة!!

أ/أشرف: لا بس قولي انت عايز تقول ايه

انا: ثانية بس … معنى ان الكارنيه ده أصلي و مكتوب فيه مستجد تخلف .. يبقى أنا دفعت رسوم التخلف!!

(عدت 5 ثواني في صمت كده)

أ/أمنية: اااااه … انت دخلت تجيب النتيجة ومكتوبلك انك مدفعتش الرسوم؟

انا: أيوه .. بالظبط!

أ/أمنية: لا دي مشكلة نت اصلا … يعني المشكلة مش من عندك

(و تكمل كلامها ..) … طيب انت جبت النتيجة؟

انا: لا لسه طبعا … منا مش عارف اجيبها عشان السبب ده!

هي: انت قسم ايه؟

انا: علوم حاسب

هي: هيا نتيجتكوا ظهرت أصلا؟

انا: أيوه ظهرت و لسه داخل الصبح ع النت و لقيتها موجودة في السايت

أ/أشرف: طيب استنى أما اشوف الموضوع ده … تعال

(قعد على الجهاز التاني و دخل سايت الجامعة عشان يتأكد الأول ان النتيجة ظهرت فعلا … بعدين اخد اسمي و القسم اللي انا فيه)

هو: جبت جيد … ألف مبروك

انا: (ملحقتش أشوف النتيجة ولا أي حاجة .. يادوب لمحت ان مفيش حاجة صفرة و خلاص)

أحمدك يارب … مش طالع بمواد

————————————————–

اتصلت بأمي اقولها ع اللي حصل … قعدت تباركلي و فرحت الحمد لله

(في البيت بقى)

قلت أشوف جايز سايت الجامعة حن علينا و صلح الخطأ المتخلف اللي خلاني أنزل الكلية

لقيت ان النتيجة برضه محجوبة

انا: (طيب فين السرير بقى؟) … انا عايز انام

ايه اللي خلاكوا تصحوني؟ … في أولويات يا جماعة

النوم ثم النتيجة

أمي: خلاص يبني الحمد لله اننا اطمنا عليك … ادخل كمل نوم بقى

انا: خلاص هستنى اصلي الضهر و انام تاني بقى

و دلوقتي انا مستني الأذان بفارغ الصبر عشان اصلي و أدخل اتقِلِب تاني على السرير

جايز لما اصحى يكونوا ظبطوا سايت الجامعة (مش عارف ليه عندي أمل زيادة كده)

و عموما الواحد اتعلم حاجة مهمة جدا من الكلية دي

“الصبر”

فأنا مقداميش الا اني أصبر من دلوقتي لحد يوم الأحد (عشان الجمعة و السبت اجازة)

و لو السايت مظبطش … هنزل الشئون تاني أعرف درجاتي كلها من هناك و خلاص

اهو برضه الواحد يكون صحي و فاق كده … بدال منا كنت رايح مش قادر أتكلم و عايز أفتح فرع للسرير في الشئون

طولت أنا عارف .. بس هعمل ايه … الضهر مكنش راضي يأذن .. و الحمد لله بدأ أهو

يلا سلامز بقى

Read Full Post | Make a Comment ( 21 so far )

النتيجة 3

Posted on Wednesday, March 11, 2009. Filed under: My Life | Tags: , |

السلام عليكم

الترم ده مش عارف حاسس ببرود فظيع  …

من يومين كده .. واحد صاحبي في رابعة بيقوللي أخبار نتيجتك ايه؟

قلتله لسه ماظهرتش …

– طيب منا عارف انها ماظهرتش … بس ماجبتهاش من الكنترول ليه؟

-يا عم سيبها دلوقتي مركونة لغاية ما تظهر رسمي و خلاص … مش هموت يعني …

المهم هربت من الكلام و شوية كده و هربت منه عشان مايجبش سيرة النتيجة تاني 😀

من شويتين كده

لقيت اختي بتناديني تقوللي نتيجتك ظهرت

قلتلها طيب هاتيها!

– أجيبها ايه!! … دي نتيجتك انت … تعال هاتها

-طيب استني هتوضى بس و جايلك

اتوضيت و رحت اشوف النتيجة

natega 1 CS 1

اه الحمد لله نجحت صافي و ده شيء جميل جدا

هوا عموما البرود في الحالات دي بيبقى كويس شوية عشان الواحد مايتوترش

انا حصل معايا مواقف كتير بسبب النتيجة الترم ده و برضه نفس حالة البرود كده

يلا الحمد لله اني نجحت 🙂

ألف مبروك للناس اللي ناجحة

و ربنا يعين اللي معاهم مواد

سلاااااام 🙂

Read Full Post | Make a Comment ( 26 so far )

النتيجة 2

Posted on Sunday, July 13, 2008. Filed under: My Life | Tags: , |

السلام عليكم

الحمد لله النتيجة بتاعتنا (تانية حاسبات و معلومات) ظهرت النهاردة

و كنت في الكلية أول ما ظهرت على طول

و من الآخر

اللي حصل كالآتي

ولو اني زعلان عشان المادة اللي معايا دي …

مش عارف 7 دي جبتها ازاي … دانا المفروض لما أكتب اسمي و اسم الحاج أبويا بيتحطلي 5 درجات

يبقى بقيت الامتحان كله واخد فيه درجتين؟!!!

دحيح أوي مش كده؟؟

ولا ظلم أوي؟؟ مش عارف بصراحة

يلا الحمد لله على كل حال

سلام

Read Full Post | Make a Comment ( 14 so far )

النتيجة!!!

Posted on Thursday, April 3, 2008. Filed under: My Life | Tags: , |

salamo 3alekoooo

loooong time no writing!

about my absence:

6b3an zay manto shayfeen ana makatabtesh 7aga men sa3et bdayet el agaza

elly 7asal b2a … eny fe el agaza kont ba5od Course Linux w 5alasto fe bdayet el derasa … aw ta2reban tany esboo3 fel derasa

w b3d keda gat zoroof CAT Scope w el meetings w el sho3’l w el mozakra (3shan el course mesh taba3 el kolya)

w l7ad delwa2ty sha3’al el 7md llah w ba7awel angez 3ala ad ma a2dar

bas keda … dah kollo kan sabab 3’yaby

about this topic: !!

enaharda youm momayaz geddan

ana gebt el natega bta3ty el naharda w el 7md llah nege7t w gebt gayed (bel 3afya)

wallahy ba7med rabena enny gebt el ta2derat de … ana fe3lan kont 5ayef men mawad 3andena bas rabena satar wallahy

ana b sara7a mesh far2a m3aya ay 7ad yeshof nategty … w 3shan fe nas el fodool byeb2a haye2telhom … ana haraya7hom w a7o6 nategty hena 😛 (“bahazzar ew3o 7ad yez3al”)
(more…)

Read Full Post | Make a Comment ( 8 so far )

Liked it here?
Why not try sites on the blogroll...