النِمَر الجديدة

Posted on Wednesday, September 23, 2009. Filed under: Other... |


الأرقام الجديدة

السلام عليكم

ظهر من فترة شكل جديد لأرقام العربيات هنا في مصر

الأرقام الجديدة تشبه اللي في الكاريكاتير اللي فوق كده 🙂

انا بقالي فترة بجمع الحروف دي … و لقيت انه من الممتع اني احطهم في بوست هنا 😀

الحروف الجديدة دي زي:

س هـ ر —> كفاية عليه كده سيبوه ينام شوية

ل ع —> حزب معارضة صعيدي حضرتك؟؟

ق ر ب —> قرب مني ارجووك

ب ع د —> رجعت في كلامي .. بعد عني احسن

ب ط أ —> بسرعة شوية يا عم

ن ق ط —> تقريبا في شتيمة مكان النقط

ن أ ط —> بينقطني الواد ده

ف ط ر —> شفتها في رمضان …

م ج —> عربية بتستهبل عاملالي فيها كباية

ب ر ع —> ربنا يخليله البراعة بتاعته

ف ر ص —> مش عارف مش عايز ينتهزها ليه

س ق ر —> أعوذ بالله من نار سقر

م و ج —> تقريبا العربية برمائية

ج و —> حر جدا بصراحة

م ص ر —> وطني اوي ياخويا!

ق ع د —> ماهو اكيد مش هيسوق وهوا واقف

د هـ ب —> العربية عيار 24

ص ع ب —> ربنا يسهلك

س ج ع —> ماشاء الله شاعر عظيم

و س ط —> خير الأمور الوسط

س ق ط (و برضه ر س ب) —> ربنا ينجحه ..

ج د —> ربنا يخليلك احفادك

ع و —> خضيتني يا معفن!

ط أ —> حد قالك اني زعلان؟

هـ ب —>العربية بتنط بدال ما تمشي زي غيرها

و ل ع —> لو شفت الحروف دي اتصل بالمطافي

د ل أ —> مش عيب تدلؤ المية كده؟

ق ص ب —> بيتوحم ياعيني!

و آخر حاجة لسه شايفها امبارح و قعدت اضحك طول الطريق …

هـ ف أ —> بصراحة صاحبها صعب عليا!

كفاية كده المرة دي

لقيت من شوية بلوج بيجمع الأرقام دي

و فيه تفصيل الحروف و الأرقام لكل محافظة

Advertisements

Make a Comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

20 Responses to “النِمَر الجديدة”

RSS Feed for BooDy's BloG Comments RSS Feed

انت ماشي تجمعهم يبني في الشارع ولا اية 😀
انا عجتني اويي
“س و ج”

اه بجمعهم

مش عيب يعني … أصلي مابعرفش اقعد على الجهاز الايام دي و اعمل حاجة مفيدة

فبستغل وقتي في كذا حاجة تانية

عربيه بابا ف السعوديه كانت

“م د ب ”

😀

اهم حاجة ميكونوش فاهمينها ف السعودية
😀

و الله أنا لما قرأت إسم الموضوع إفتكرت إسمه “البقر الجديده” .. لدرجة إني فعلا كنت داخل عشان أشوف إيه البقر ده كمان

لا بس موضوع غريب .. يعني إنت ماشي في الشارع تجمع نمر عربيات ..

و عموما اللي يعيش ياما يشوف

بقر؟!
لا انا لسه موصلتش للمرحلة دي يا كريم

ربنا يستر و ماوصلهاش!! 🙂

=))
بوست دمه خفيف قوي
بس أنا كل الحروف اللى بأشوفهم
ملهمش معني خاالص
وأقعد أحاول أوصل هما بيدلوا على ايه مهما عملت عمري ما وصلت
أكتر حاجة بأشوفها س م ك
دي الوحيدة اللى فهمتها 😀
يلا قال يعني هى ناقصة لخبطة
أنا بأحفظ الأرقام أسرع أعتقد استحالة أحفظ رقم عربيتنا لو قلبت حروف 😀

بس ازاي ملهمش معنى
ده أكتر حاجة منتشرة في المنصورة
“د ب أ”
داتابيز أدمن

(أو كما قال ميتو)

فكرتني بيا لما كنت زمان بحفظ نمر العربيات الي بقابلها ف الشارع مش عارف انا كنت بعمل كده ليه بس الحمد لله معدتش بعمل كده 😆
احنا عربيتنا كانت
ب ط م
اعكسها هتبقى مطب 😆

على فكرة “ب ط م” أحسن من “م ط ب” و معناها اوقع

عشان المطبات في مصر مقلوبة اصلا
المطبات كلها لتحت مش لفوق

في نمرة
ا هـ
يعني الراجل كل شوية بياكل مطب
😆
عسل ياض والله
🙂

“اه” ده أكيد في مجلس الشعب

وده واحد من اللي دايما بيقولوا “موافقة” (بفتح الفاء)

وكمان فى نمر تانيه ياعوبد بس شكلها مدى على شتايم مش حلوه
حلوه التجميعه دى ربنا معاك وتكمل الألبوم 😀 😀 😀

شفت منهم بس عيب أحط حاجة في بلوجي الشريف
😛

جامدة جداً و الله يا بودى
بس مش غريبة شوية هواية تجميع نمر العربيات دى 🙂

على العموم انتا ادخلت السرور عليا و الله بعد شوية شغل تقنى عنيف 🙂

الهواية مش غريبة ولا حاجة … الأرقام هيا اللي غريبة!!

ربنا يجعلك من المسرورين ف الدنيا و الآخرة 🙂

😆 😆 😆

nice Topic 😀

بالمناسبة أنا امبارح قلت أجرب اقرأ الحروف الانجليزي

لقيت

“B A D”
“B A R”

والله حلو مرة الحركة هادي الي اعملتها يا عبقري


Where's The Comment Form?

Liked it here?
Why not try sites on the blogroll...

%d bloggers like this: