صباح السرعة!

Posted on Saturday, November 22, 2008. Filed under: My Life | Tags: , |


النهاردة يوم لذيذ جدا
صحينا (أنا و عابد) من النوم على معاد الامتحان (10:30)

و لبسنا و اخدنا كل حاجة قدامنا حطيناها في جيبنا

و نزلنا بسرعة .. و كل شوية نتصل بحد من صحابنا .. اللي يكنسل و اللي قافل موبايله … و في الآخر واحد منهم رد عليا و كان عند الكلية .. و قاللي انهم دخلوا

وقفنا تاكسي و رحنا الجامعة
دخلنا الامتحان متأخر نص ساعة
قعدت النص ساعة الباقية مش عارف بعمل ايه

مش عشان الامتحان صعب ولا حاجة
لأ عشان متوتر جدا و خايف الوقت ميكفيش

خرجت من الامتحان … رجلي سايبة من بعضها (لسه)

قعدت اضحك مع صحابي عشان انسى الامتحان

قعدنا نعمل كام حاجة و بعدين روحنا …

قلت آخد غدايا معايا عشان مفيش حد في البيت النهاردة

رجعت البيت … كتبت الموضوع ده و أنا باكل
عشان أوفر وقت للنوم اللي انا مانمتوش!

كل ده و لسه نص اليوم ماعداش

فعلا احنا في عصر السرعة!!!

سلام

Advertisements

Make a Comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

9 Responses to “صباح السرعة!”

RSS Feed for BooDy's BloG Comments RSS Feed

ya 3mmmmmmm kolna lha we el 7amdlelah 3ala kol shy2

ايه يا بودى ده..انتا عايز تعمل
Bandwidth control 😀

انا امتحاناتى كانت الاسبوع اللى فات و متقلقش..نفس الموقف بتاعك بالظبط 🙂
و بعدين مش تقولى عشان نروح ناكل فى الوكر بتاعنا

دي ضريبة المزاكره ياعبد الله معدتش تزاكر بقى 😀

ادي أخرة اللى ينام
ليلة الإمتحان ساعات بأحس أن النوم فيها بقي حرام شرعا !!!
ما علينا المهم الإمتحان عدي وباقى ربع يوم عشان نذاكر للمادة التانية 😀
ويا ريت حضرتك بعد كدا تعمل حسابك تنزل من البيت الساعة 9 ونص ولا حاجة عشان لو حصل تأخير تبقي فى السليم!!!!
وكالعادة كله بيقلب خير (بطريقة ما) فى الاخر
سلام

الحمدلله انه عدى دا كان يوم
…………………..
بس كدا
سلام

انا كان عندى امتحان اعمال سنة ( قياسات ) الساعة 9 الصبح
يعنى المفروض بما انى بركب مواصلتين علشان اروح الكلية اطلع بدرى ساعة مثلا
دا المفروض
العقل بيقول كده
انا بقى كنت بزاكر طول الليل و قولت انا هطبق علشان اعرف اروح ولما اجى انام
الحمد لله نمت من كتر التعب و صحيت على الموبايل امه لا الاه الا الله رنت عليا نص الدفعة مثلا
صحيت بقى رديت على اخر مكالمة وقولت انا هلبس و جاية اهو لاقيت صوت صاحبتى بتقولى جاية اهو
يا خبر هو انتى نايمة
يعنى انتى لسه فى بيتكم
قولتلها انا بس غفلت كده
قالتلى يخرب بيتك دا الساعة 9
طبعا انتوا عارفين رد الفعل بقى فى الموقف ده 🙂
المفروض انى اتصدم بقى و الحوارات دى
عادى جدا قولت ايه كده كده الامتحان فنيتوا خلاص
هقهر نفسى ليه بقى
انا كنت اتأخرت على امتحان قبل كده بردو بس كانت الميكروباص حبكت العجلة بتاعته تنفجر على حظى فا روحت امتحان الكنترول متأخر و كان بتاع دكتور اسمه تامر حجازى
دكتور جينتل جدا
مارداش يدخلنى مع الجروب التانى و قالى اطلعيلى المكتب
انا قولت دى فيها شيل مادة ميه فى المية 🙂
خلص الامتحان و طلعتله المكتب
طبعا اللى هو انا خلاص بقى هشيلها يعنى هشيلها
قولتله على اللى حصل قالى تحبى تمتحنى تانى فى يوم ايه؟؟؟؟
🙂
والله راجل عسل
و قعد يقولى على جدوله بيجى امتى و بيقى فى القاهرة امتى علشان انا اختار وقت يناسبنى اروحله يمتحنى فيه 🙂
والنبى فى كده:)
المهم بقى اتفقنا على ميعادوفى الميعاد التانى ده بقى خليت عندى دم و روحته والله المرادى فى الميعاد
المهم بقى ياخوانا روحت ماعايش غير قلم رصاص
تخيلوا امتحان كنترول فى تالتة رايحاه بقلم رصاص بس
لا مسطرة ولا ورقه ولا اله حاسبة ولا اى حاجة تبع الكنترول خالص ولا تبع اى حاجة
صحابى بقولولى يابنتى استنى نجيبلك قولتلهم والله انا اخرى كده انا على اخرى اصلا سيبونى انا هاخده منه
المهم طلعت لاقيته بيقولى معلش انا لازم امشى بصى انا هتصلك بالمعيد اللى بيديلك فى السكشن يمتحنك هو فى الوقت اللى انتى عاوزاة بردو
والله كتر خيره الراجل 🙂

روحت للمعيد قالى هوانتى بقى رميساء
طيب حضرتك تحبى تمتحنى امتى
قولتله امممممممممممم
يوم السبت انا ريست
والاحد سكاشن مش بنزل
الاتنين بقى بحضر محاضرة الفترة التالتة بس لو حضرتك عندك سكشن الفترة الرابعة انا ماعنديش مانع 🙂
طبعا هتقولوا دى راحت يوم الاتنين بقى
هوانا روحت فعلا بس ماكانشى ليا مزاج امتحن فا بعد ما الفتره خلصت قابلنى فى الكوليدور وقالى مش جيتى تمتحنى ليه قولتله بصراحة ماليش مزاج
يوم الاربع بقى هبقى انزل مخصوص امتحن
واللى انتوا ماتعرفهوش بقى انى اصلا عندى سكشن كنترول للمعيد ده يوم الاربع وانا مش بحضر اصلا
المهم بقى مش اروح حتى احضر و بعدين امتحن لا طبعا واتعب نفسى وانزل الفترة الاولى لالالالالالالالالالا
روحتله الفترة التالتة كده و قولتله انا عاوزة امتحن ممكن
والراجل طلع جنتل بردو و امتحنى:)

طبعا انتوا عاوزين تسألوا انا عملت ايه فى اتمتحان القياسات اللى هو المفروض الساعة 9
روحت الساعة 10 و ربع و الباشمهندس بردو عادى جدا دخلنى و قعد يهدينى و المفروض الامتحان هيخلص على 10 ونص
قالى انتى ما تقوميش اقعدى كملى انتى عادى و هدى نفسك اجيبلك شاى كده يعنى
بس انا مش بشرب شاى بقى فا رفضت 🙂
عموما انا ماحاولتش اتقل على الراجل الساعة 10 وتلت بالظبط قومت اسلم الورقه قالى ليه كده كلمى قولتله بعد اللى حصل ده كله و تقولى كملى دا انا من ساعة ما خرجت من بيتنا وانا اليوم باين عندى من اوله انا نسيت كل حاجة اصلا
ياله بقى ربنا يرحمها 🙂

وفى الاخر جبت جيد فى المادتين الحمد لله و عديت 🙂

ولا يهمك يعنى يا بودى
ربنا بيسهل
وسورى طبعا على الاطاااااااااااااااااااااااااااااالة 🙂

@metoo:
الحمد لله!!
بقوللك ايه يا ميتو!! … لو خبطت في الدسك اللي انا قاعد عليه النهاردة كمان هقوم من الامتحان اضربك و أرجع!!
😛

@Ahmed el-gamil:
باشا!! … واحشني والله! 😀
الظاهر ان الكات كلها حصل معاها نفس الموقف ولا ايه؟!!
و معلش بقى مكنتش أعرف انك رايح الوكر النهاردة 😀 لو كنت اعرف كنت جيت!!

@ahmed samir:
احمد … انت هتبصلي في اليوم اللي بذاكره قبل الامتحان كمان؟!!!

@your fate:
والله انا نازل كمان شوية …
التزام بقى!!!
اللي يتلسع من الشوربة …. يستنى شوية على ما تبرد!!

@key of life:
فعلا والله … هوا يوم “تيييييييييييييت”

@roma:
هههههههههههههههه
على كده أنا غلبان جدا!!!
بس معتقدش ان في عندنا دكاترة كده!!
ماجيتش في المعاد يبقى ماتمتحنش
هي دي حاسبات!! 😀
الحمد لله اني لحقت أقعد النص ساعة
ده المعيدة اللي كانت بتراقب عليا بتقوللي في الآخر “لو الدكتورة شافتكوا لسه قاعدين لحد دلوقتي هتـ………”
و مكملتش!!
قلتلها: هتقتلنا؟
قعدت تضحك و مارديتش!!

الله اعلم كانت هتعمل فينا ايه بقى! 😀

بجد بجد الحمد لله!!

يلا سلام بقى عشان الحق اراجع مع صحابي شوية قبل الامتحان 🙂


Where's The Comment Form?

Liked it here?
Why not try sites on the blogroll...

%d bloggers like this: