This is why i like my friends

This is why i like my friends …

تحذير من التخدير

السلام عليكم

امبارح وانا راجع من المنصورة

كنت مستني دوري في طابور حجز التذاكر … -الذي لا يختلف عن طابور العيش اختلافا كبيرا-

المهم لقيت تحذير شدني شوية

مكتوب فيه -على حسب منا فاكر-:

تحذير:

يرجى عدم تناول الأطعمة أو المشروبات من أشخاص مجهولي الهوية منعا لعملية التخدير و السرقة

ماتخيلتش ان السرقة ممكن تيجي من شخص بيبينلي انه عايز ياخد الثواب بس

بس لما رجعت البيت أمي قالتلي:

“إذا كانوا بيسرقوا في الحرم … مش هيسرقوا هنا؟!”

اها … كلام مقنع بصراحة

بس بصراحة جزاهم الله خيرا على التحذير .. هوا أكيد اتكتب بعد ما عملية من دول حصلت .. بس كتر خيرهم انهم كتبوه

وانا قلت أكتبه برضه هنا عشان محدش يثق في أي حد مايعرفوش

سلام

هوا لسه؟!!

السلام عليكم

……….

أنا نفسي اعرف

هوا لسه في كده؟!!

الرسالة دي جتني ع الميل

مضايق قل لا اله الا الله سيدنا محمد رسول الله امانه فى عنقك الى يوم الدين ترسلها لكل الى عندك حتى لو كنت انا منهم اقسمت عليك بالعزيز الجبار ان ترسلها لكل الموجودين عندك انشرها عسى الله يفرج همك

بصراحة انا ضد الرسايل دي

و ضد أي حد من اللي بيبعتلي الرسايل دي!

ليه!

لان اللي كاتبها -غالبا- مافكرش قبل ما يكتبها

يعني ايه تقسم عليا اني اعمل حاجة انا مش مرغم اني اعملها؟

اه ممكن واحد يقسم عليا لما اكون بعمل حاجة غلط و هوا عايزني اعمل الصح

بس ان حد يقسم عليا أسبح!!! خير يعني؟!!

هوا القسم بقى بالسهولة دي؟!

افرض انا مابعتهاش زي مانت اقسمت عليا .. يبقى انت اللي عليك الوزر او الاثم

ياريت تفكروا قبل ما تبعتوا حاجة زي دي و تنشروها و توصلي من اكتر من شخص على الميل!!

سلام

Organized my Hard Drive

السلام عليكم

واحدة من المشاكل اللي كنت عايز أحلها بأي شكل هيا مشكلة الهارد بتاعي

الهارد سليم و الحمد لله بس المشكلة في تنظيمه بقى

انا كنت حاطط

3 Operating Systems

عليه … و هما:

• Fedora
• Ubuntu
• Windows

من اول ما بدأت الأجازة و أنا مابستخدمش الابونتو و الوندوز خالص

ممكن ادخل اعمل حاجة بسيطة جدا و اطلع تاني

فقررت اني أشيلهم و أسيب الفيدورا

و النهاردة كل اللي كان في بالي شوية حاجات اعملها:

1- أشيل الوندوز الحقير ده

2- أشيل الأبونتو لانها خنقتني

3- أحط الوندوز على Virtual Machine

4- في كل العمليات اللي فاتت دي … مافقدش حاجة من الداتا اللي عندي

و بالتالي عملت Backup

و الحمد لله المهمة انتهت و نظمت الهارد

و كده بقى اللي عايز يدخل على الوندوز …

يتنيل يدخل ع الفيدورا الأول و بعدين يدخل ع الوندوز من جوا

وده المفروض كان يتعمل من الأول لان الوندوز ده مش من حقه يبقى على الـ

Physical Machine كده

لازم يترمى في الـ Virtual

The real vacation

Panorama shot in 3ajeeba - Matrouh

السلام عليكم

بقالي حوالي اسبوع مابقعدش في البيت

يوم الأربعاء 15-7-2009 رحت البلد عشان مشوار مهم

و رجعت يوم الخميس بالليل … يومها كنت راجع بالطيارة

المهم كنت متفق مع صحابي اللي سبقوني و راحوا جمصة اني هروحلهم على يوم الجمعة

و فعلا رحتلهم جمصة و قعدت معاهم اليومين الباقيين في المعسكر

و هيصنا و عملنا كل اللي عايزين نعمله و قضينا يومين جامدين بجد

(مش عشان جمصة …لأ عشان الصحاب بس)

المهم يوم الأحد الصبح كنا راجعين

و كنت متفق مع صحابي اسلام و الأهلاوي و مسعود اننا نروح مطروح على يوم الأحد عشان نحضر فرح أخت محمد السيد

طبعا مقدرتش أروحلهم يوم الأحد عشان لسه راجع من جمصة .. رحت يوم الاثنين (اللي هوا يوم الفرح)

قضيت أحسن يومين في الأجازة و رجعت امبارح (الأربعاء) بالليل

رحلة مطروح دي كانت مطلوبة بجد عشان تغيير الجو

وفعلا الرحلة كلها كانت حلوة ماعدا التاكسي اللي ركبته في آخر اليوم … أصل لازم يبقى في حاجة تبع جنينة المصريين في الآخر -.-

بس بعد فترة من تغيير الجو و الفسحة و الحاجات الحلوة دي … ان شاء الله هرجع للشغل اللي ورايا و اللي أجلت منه كتير في الفترة اللي فاتت دي

بس فعلا الواحد كان محتاج لفترة النقاهة دي

بشكر كل صحابي على الفترة اللي قضوها معايا

بجد استمتعت بالاسبوع الجميل ده مع رجالة 513 … بس في أماكن متفرقة

و أخيرا أحب أقول اني لما رجعت لقيت عندي:

57 mail, 98 tweets & 113 reader’s topics

فقدامي مشوار على ما أخلص الحاجات دي

سلام