BooDy's BloG

النية موجودة

Abdallah Saeed — Wed, 16 Nov 2011 01:05:54 +0000

ساعات كتير بقعد بالأيام أفكر في حاجة أعملها وفي الآخر ماعملهاش

سواء في الحياة العلمية أو الأسرية أو المشوارية أو حتى المعدنية ..

وانا في الجيش دايما بقعد أفكر هعمل ايه لما أنزل أجازة … مش كدا وبس ده أنا بكتب و ممكن كمان اعمل خريطة للحاجات اللي عايز أعملها

وبمجرد اني انزل أجازة مابعملش منها حاجة إلا لو الموضوع ملح (بضم الميم) أوي

ولما قلت لكذا واحد حواليا على المشكلة دي كل واحد يقولي حاجة!

اللي يقول “انا كده والله برضو”

واللي يقول “ازاي يعني … مش بتبقى فاضي طول الأجازة!”

واللي يقول ” إنوي انت بس وهيا هتتحل لوحدها”

ماهي يا شخص انت النية موجودة بس انا مابعملش حاجة

ممكن انا بس محتاج أرتب أفكاري شوية لاني مشتت بقالي فترة

ع العموم كويس ان النية موجودة ع الأقل .. في جزء يخليني أتفائل بس يارب يكمل بقى

ولسه…

Abdallah Saeed — Sat, 18 Jun 2011 17:57:36 +0000

ابن اختي طلع على وش الدنيا يوم 6 يناير 2011

دخلت الجيش يوم 16 يناير 2011

الثورة قامت يوم 25 يناير 2011

ضرب نار وحوارات سخنة كتير عندنا في الجيش يوم 28 يناير 2011

الريس تنحى يوم 11 فبراير 2011

اترحلت لمستشفى كوبري القبة للقوات المسلحة يوم 15 فبراير 2011

اترحلت تاني لمستشفى فايد العسكري يوم 2 مارس 2011

ودلوقتي مش فاكر أي حاجة مهمة حصلت من يوم 2 مارس تتسجل هنا في المدونة

بس حبيت أقول ان بالرغم من ان المدونة مهجورة بقالها فترة الا ان في زيارات برضو بال20 شخص بيدخلوا في اليوم الواحد

وده شيء عظيم بصراحة أشكركم عليه

افطار جماعي :)

Abdallah Saeed — Fri, 20 Aug 2010 22:30:41 +0000

قضيت امبارح يوم جميل جدا مع اصدقائي في المنصورة

كنا متفقين نعمل افطار جماعي وفعلا عملناه وكنا عدد كبير والحمد لله

استمتعنا جدا باليوم والحمد لله كلنا كنا مروحين مبسوطين

Tagged: 513, Friends

EED 2010

Abdallah Saeed — Thu, 05 Aug 2010 21:05:42 +0000

اشتركنا السنة دي في الـ EED

دخلنا بمشروع التخرج والحمد لله ناس كتير عجبهم المشروع و أخدوا اللينك بتاعه عشان ينزلوه

تعبنا كتير بصراحة في ال3 ايام دول بس كنا مبسوطين جدا و الحمد لله

و في آخر يوم أخدت امضاءات الناس اللي شاركوا بمشاريعهم (بس للأسف مش كل الناس مضت)

للذكرى

Tagged: projects, مناسبات

النتيجة

Abdallah Saeed — Wed, 21 Jul 2010 17:42:01 +0000

السلام عليكم ورحمة الله و بركاته

زي مانتوا شايفين العنوان .. النتيجة ظهرت النهاردة و الحمد لله

و احب اعلن من موقعي هذا اني اتخرجت

اي والله اتخرجت

وجبت جيد كمان

مش بس كدا

و جبت امتياز في مشروع التخرج

الحمد لله اننا وصلنا لليوم دا

انا عايز اقولكوا ان اول حاجة عملتها بعد ما عرفت النتيجة و اطمنت على صحابي هيا اني غيرت حالتي في الـ C.V

من طالب لخريج جايب امتياز في مشروع التخرج

حاسس بفرحة كبيرة و راحة نفسية كمان و الحمد لله

يارب كدا عقبال ما اخد اعفاء من الجيش … وانتوا كمان يارب … سواء شباب او بنات كمان اهو

ربنا يوفقنا جميعا

البوست دا هيفضل ذكرى للتخرج … فاللي عايز يكتب اللي ف نفسه يكتب

سلام

Tagged: College, Life Changes, مناسبات, النتيجة

مفاضلش غير …

Abdallah Saeed — Mon, 19 Jul 2010 22:45:21 +0000

السلام عليكم ورحمة الله وبركاته

امبارح كان يوم من الأيام اللي مابتجيش في العمر أكتر من مرة

امبارح كان مناقشة مشروع التخرج …

Network Topologies Creator

المشروع نفسه علمني حاجات كتير

و المناقشة الحمد لله كانت كويسة جدا ..

بس بصراحة .. انا لحد ما خلصنا المناقشة برضو مكنتش مبسوط اوي

بس اللي فرحني بجد هوا الكلام اللي البشمهندس وليد العدروسي و البشمهندسة سارة المتولي قالوه علينا و على المشروع

بجد كنت طاير م الفرحة وانا بكلمهم

أنا فعلا بعتز بإني عرفت الناس دي و اتعلمت حاجات كتير منهم

وبشكرهم جدا جدا جدا على كل اللي قدموه لينا طول السنين دي

امبارح كان يوم تاريخي فعلا

18-7-2010

يوم مايتنساش

هتوحشني دفعتي جدا لاني فعلا حبيت أكون في وسطهم

هفتقد الأيام دي جدا

ونفسي نتجمع بعد حوالي 3 سنين كدا كلنا نشوف بعض و نتكلم مع بعض و نعرف مين عمل ايه في ال3 سنين دول وكدا

ملحوظة .. 3 سنين عشان لو لا قدر الله حد له جيش و دخل ظابط

—-

أكيد هفتقد كمان التجمعات مع صحابي و التهييس اللي كنا بنهيسه

بس اللي متأكد منه 100% .. هوا اني مش هفتقد الناس المملة اللي كانت بتفرض نفسها على حياة الناس التانية

أتمنى لكم التوفيق و النجاح في حياتكم

احتمال كبير يكون للموضوع ده تكملة بعد حفلة التخرج ان شاء الله

السلام عليكم

Tagged: College, Friends, Life Changes, projects, مناسبات

قلقاس

Abdallah Saeed — Sun, 27 Jun 2010 22:51:29 +0000

السلام عليكم ورحمة الله وبركاته

مع اني اتأخرت بس مارضيتش أضيع فرصة الكتابة عن يوم نهاية المرحلة الجامعية

وبالنسبة لعنوان البوست … ماتدقوش اوي كدا

مانتوا بقالكوا سنيييييين بتاخدوا مناهج ملهاش علاقة بالمسمى بتاعها .. جت ع البوست بتاعي و هتقفوا؟

المهم بقى الحمد لله يوم 24-6-2010 ده كان يوم جميل جدا بكل ما تحمله الكلمة من معنى

خرجنا و قطعنا نفسنا فسحة عشان ميبقاش نفسنا في حاجة

اليوم ده بأمانة مايتنساش أبدا

أخدت الصورة دي في آخر اليوم

ربنا يقوينا و نخلص مشروع التخرج على خير يارب ونجيب كلنا امتيازات

Tagged: 513, College, Exams, Friends, Life Changes, Vacation, تهييس

امتحانات وكلام من دا

Abdallah Saeed — Sat, 19 Jun 2010 17:07:27 +0000

بقالي اسبوع بمتحن و بقالي اسبوع و أخلص امتحانات خالص ان شاء الله

مش همتحن تبع التعليم المتخلف بتاعنا ده تاني ان شاء الله!

ده حلم أجيال كتير فعلا

–

الحياة تبدأ من هنا!

–

وفقنا الله جميعا لما يحبه ويرضاه

Tagged: College, Exams, Life Changes

إدراك الإدراك (via Simplutions)

Abdallah Saeed — Tue, 15 Jun 2010 10:17:11 +0000

موضوع اخر بخصوص كتاب Secrets of the ROCK STAR Programmers

كما وعدتكم بكتابة أكثر من موضوع بخصوص هذا الكتاب

و بإذن اللي سأكمل المسيرة

أثناء قرائتي لكتاب Secrets of the ROCK STAR programmers أعجبني مصطلح ذكره الكاتب يسمى meta-cognition أو ما نطلق عليه باللغة العربية إدراك الإدراك المصطلح ببساطة يعني “التفكير في ما تفكر” أي تحليل ما تفعله أو تريد فعله يدعوا المصطلح إلى تحليل المشكلة التي قمت بحلها (سواء برمجيا أو بالتخطيط) ويدعوك لتسأل نفسك بعض الأسئلة منها: كيف أشعر الآن؟ هل أبلي بلاء حسنا في حل المشكلة؟ ما هو الشعور الذي أشعر به الآن؟ هل يؤثر كل هذا في ما أفعله الآن؟ وما إلى ذل … Read More

via Simplutions

Tagged: ROCKSTAR, مفيد

إخفى

Abdallah Saeed — Sun, 06 Jun 2010 20:17:25 +0000

إلى كل شخص بيرغي كتير على الفاضي و بيحاول يحكي قصة حياته في كل رد ليه

و إلى كل شخص كل كلامه شكوي

وإلى كل شخص بيعمل حاجة معينة عشان يقول للناس أنا تعبت فيها بس مش أكتر

وإلى كل حيوان بيحب يبقى مصدر للاشاعات

ابعد عني لأنك غبي و محبط وانا مش عايز أبقى غبي زيك
مهما كنت … انت غبي!

وإلى كل شخص بيحاول يخنق عليا

متحاولش … في كتير غيرك حاولوا و فشلوا

Tagged: نرفزة, جنينة المصريين