عيد بعد عذاب شديد

السلام عليكم

كل عام و أنتم  بخير بمناسبة عيد الاضحى المبارك

—–

النهاردة و الحمد لله كان نهاية امتحانات الميدترم

و الحمد لله انها خلصت والا الواحد كان جاله تخلف عقلي بسبب لخبطة الوقت دي

نظامي في الامتحانات دي كان أغرب نظام مشيت عليه في حياتي:

1- ابدأ مذاكرة ليلة الامتحان الساعة 11 أو 12 بالليل

2- اسهر للفجر في مذاكرة مستمرة و سحور في النص و عصير أو شعرية بلبن أو كراميل

(ده على حسب مزاجي انا و عابد)

3- انام ساعتين أو 3 ساعات بالكتير

4- أكمل مذاكرة و اسيب وقت للمراجعة في الاخر

5- اروح امتحن و اكتب اللي اعرفه و اللي معرفوش

6- ارجع أعمل حاجة للفطار

7- افطر و أنام

8- أقلب في النت شوية و ادلع لحد ما الساعة تيجي 11 احس بالضغط و أبدأ اذاكر المادة اللي بعدها

و الحمد لله اخر امتحان كان النهاردة و حليت كويس بفضل ربنا!

اليوم النهاردة كان جميل لحد ما خلصت كلية و قررت اني اسافر في اسرع وقت ممكن

من غير تفاصيل كتير عشان ممكن اشتم لو توسعت في الموضوع

انا طلعت من بيتنا في المنصورة الساعة 3 و ربع تقريبا

وصلت بيتنا في القاهرة الساعة 9 تقريبا

يعني حوالي 6 ساعات بهدله

حوالي ساعتين منهم مكنتش مستمتع بوجودي في جنينة المصريين

ربنا يسترها علينا بقى

كفاية عشان انام

سلام