اعمل نفسك عبيط
ليه الناس بتحب تتبع اسلوب “اعمل نفسك عبيط” و لما يكون في طابور بياخدوا دور الناس اللي جايين من بدري
و ليه برضه الناس مابتحترمش نفسها الا لما الواحد يزعق و يقرب يشتم؟؟
و ليييييه كمان الناس مابتتكلمش الا لما حد يبدأ يزعق؟؟
الاسئلة دي جت في بالي امبارح لما كنت في طابور محطة اتوبيس القاهرة لما لقيت الناس بتتزاحم قدامي وانا جاي من بدري و بدأت أزعق و الناس بدأت تنصرني و الناس اللي جايين متأخر احترمت نفسها
Wednesday, October 28, 2009 at 2:46 am
طب كويس جدااااا
أنا اتحطيت فى حالة مقاربة
يعني تقدر تقول كان فيه ناس فى محل ومعاهم تقريبا فريق حضانة
ويا سلااام على الهدوء بقي
حاجة فووووووق الوصف
وقعدت ارمي كلام أنا وأصحابي
بس محدش عبر وبقي الوضع كما هو عليه
ده الموقف ده حضرتك تحسد عليه
Wednesday, October 28, 2009 at 6:25 pm
معلش ..هو دا الطبيعى من بنك مصر
قصدى انك فى مصر
لو لقوا حد ساكتلهم يتمادوا فيها ومحدش يحترم نفسه من سكات..ساعتها مينفعش الذوق فعلا!!
Wednesday, October 28, 2009 at 8:28 pm
في اعتقاد سائد ان الانسان اللي بيزعق ده لازم يكون في حاجة مقوياه انه يزعق..
وبما ان تسع اعشار الشعب يتميز بالجبن والخوف…
فبيحترموا اللي بيزعق..باعتباره اكيد يقدر ياخد حقه…
وبما ان الوضع ده مش هيتغير قريب ان شاء الله..
النتيجة: الاستراتيجية الصح لما البني ادم يلاقي الناس بتستعبط..انو يحرجهم ويعلي صوته موجها او ملقحا الكلام عليهم…
يا اما يكشوا..يا اما يعلو درجة الاستعباط…انت وحظك:)
Wednesday, October 28, 2009 at 9:49 pm
لان ده شعب دايما ساكت ..
ساكت على حقه .. ساكت على حاله .. ساكت عن انه ينطق و يطلعله صوت حق ..
و عامل عبيـــــط
و بالتالي لازم حد يزعق و يتخانق و يجيب عليها واطيها عشان اللي حواليه يبتدي يفوق .. و لكن للاسف بيفوق بشكل مؤقت جداا
و عمار يا مصر
Thursday, October 29, 2009 at 3:07 am
@ur fate:
بصراحة اكتر اسلوب لاستفزاز الناس هوا رمي الكلام
فأحييكي لانك عرفتي تتعاملي مع الموقف صح
@baby:
المشكلة مش في كده بس
ماهو في ناس كويسين كتير
بس المشكلة ان العدوى بتوصلهم
@emanD:
تحليل جامد جدا
بالنسبالي دي كانت أول مرة -تقريبا- أزعق فيها للناس اللي مش ملتزمين بدورهم
بس عجبتني التجربة و ممكن اكررها ان شاء الله
@Rana:
“مؤقت” فعلا
لان بعد ما زعقت لقيت واحد واقف جمب الشباك كده و عامل نفسه “عايز يسأل بس”
و عموما هوا ماحجزش برضه لاني كنت مبحلق في وشه عشان ياخد باله ان في حد هياكله لو فكر يحجز قبل دوره
Thursday, October 29, 2009 at 9:37 pm
هههههههههه .. ياراجل إنت زعلان عشان واحد خد دورك في طابور محطة الأتوبيس .. إستني بس و شوف لما واحد ياخد دورك في الحياه و المعامله و المكانه ..
إستني لما تبدأ تحتك فعلا بالواقع لما تتخرج و تبدأ تحتاج حاجه من الحكومه .. أنا بيتهيألي إنت ساعتها هتكتب بوست ميت ألف صفحه
Thursday, October 29, 2009 at 9:38 pm
و كما قال أبو القاسم الشابي
إذا الشعب يوما أراد الحياة فلا بد أن يستجيب القدر
ولا بد لليل أن ينجلي ولابد للقيد أن ينكسر
ومن لم يعانقه شوق الحياة تبخر في جوها واندثر
كذلك قالت لي الكائنات وحدثني روحها المستتر
ودمدمت الريح بين الفجاج وفوق الجبال وتحت الشجر
إذا ما طمحت إلى غاية ركبت المنى ونسيت الحذر
ومن لا يحب صعود الجبال يعش ابد الدهر بين الحفر
فعجت بقلبي دماء الشباب وضجت بصدري رياح أخر
وأطرقت أصغى لقصف الرعود وعزف الرياح ووقع المطر
وقالت لي الأرض لما سالت: يا أم هل تكرهين البشر ؟:
أبارك في الناس أهل الطموح ومن يستلذ ركوب الخطر
وألعن من لا يماشي الزمان ويقنع بالعيش ، عيش الحجر
Thursday, October 29, 2009 at 9:49 pm
@KAM:
ايه التشاؤم ده حرام عليك يابني!!
و بعدين انا لو سبت ده ياخد مكاني في محطة الاتوبيس … هتعود اسيب حقي بسهولة و ده اللي ممكن يخلي حاجة زي اللي انت بتقول عليها تحصل!!