البقاء للأسرع
الناس بقت تتهور أوي و تستهين بالمسئولية بتاعتها
و تستهين بحياتها كمان
انا اقصد في الموضوع ده … تهور سواقين العربيات
خصوصا الميكروباصات
النهاردة رجعت من البلد في طيارة … أقصد ميكروباص طبعا .. بس -اللهم لا حسد- مركب اجنحة و بيطير
الركاب كلهم مبحلقين في شباك المكروباص بيتفرجوا هيموتوا ازاي …
وكل واحد ماسك الكرسي اللي قدامه بإيد … و الإيد التانية على قلبه
السواق مكانش إنسان ….
أعتقد ان دي الحاجة الوحيدة اللي كنت متأكد منها -غير اننا هنموت-
و يمشي في المخالف بأقصى سرعة و عمال يسبق كل العربيات التانية و يعمل غرز في نص الطريق
ولو مثلا لقى عربية جاية في وشه من بعيد … مش مثلا يستنى ورا العربية اللي جمبه على ما التاني يعدي
لالالالالا ازااااااي!
لازم يجري بسرعة و يحود قدام اللي كان جمبنا من لحظات
و ياسلام بقى لو حد عايز يجي قدامنا
السواق يقوم دايس بنزين جااااااامد عشان التاني ميدخلش
و من هنا تم اثبات نظرية “البقاء للأسرع” .. 
كان في موتسكل جاي في وشنا و ماشي بسرعة هوا كمان
لا السواق بتاعنا عايز يهدي ولا الموتسكل عايز يهدي
والله كان فاضل مابينهم حوالي اتنين متر مثلا و خلاص هيلبسوا في بعض
بس الاتنين حودو بسرعة
و الغريب ان الاتنين محدش منهم علق … لا عادي … ده تقريبا كان شيء طبيعي بالنسبالهم
——————
ربنا يستر علينا بقى لحسن الاجيال بتتطور و مش بعيد الجيل الجاي يطبق نظرية “البقاء للأقوى” و يبدأوا يدخلوا في بعض
Tags: جنينة المصريين
You can comment below, or link to this permanent URL from your own site.
Friday, July 17, 2009 at 2:06 am
ههههههههههههه
بعيدا عن أن الموضوع مش مضحك يعني
بس بأضحك على تفكير الناس دي
وهى ليه بتعمل كده؟!!
لو مش فارقة معاه حياته المفروض يفكر فى حياة الناس
والمشكلة بقي أن عشان الواحد يسافر من هنا للقاهرة لو ملحقش السوبر جيت مفيش قدامه غير الميكروباص وده فى حد ذاته مصيبة وخصوصا أن أخويا بيسافر اسبوعيا
لو أنا اللى بسافر مش مشكلة
المشكلة الأكبر لما حد تاني يسافر وخصوصا لو مفيش غير الميكروباص
مش عارفة ايه المشاكل دي كلها
عامة ربنا يسترها علينا
وحمد لله على السلامة
Sunday, July 19, 2009 at 1:28 pm
اااااااه
ليييييييييه فكرتيني بميكروباص القاهرة
انا جربته مرة واحدة
و مش ناوي أجربه تاني الا في الظروف الطارئة
Friday, July 17, 2009 at 1:40 pm
يلا معلشى هيا الدنيا بقت كده
سباق فى كل حاجه
ايوه فى كل حاجه ؟
وأى حاجه ممكن تتصورها يا بشمهندس
يلا ربنا يستر علينا بقى
تقبل مرورى
ملحوظه صغيره
بجد أسلوبك فى الكتابه راائع
شيق ومتتع ااوووى
سلام
Sunday, July 19, 2009 at 1:26 pm
شكرا على الكومنت المشجع ده
Friday, July 17, 2009 at 4:27 pm
هو انا معرفش بيبقوا مستعجلين اوى كدا على ايه !!
ماهم راحوا ولا جم سواقين مكروباصات فعلا
ربنا يسترها .. وحمدالله على السلامة
Sunday, July 19, 2009 at 1:31 pm
في عالم الميكروباص ..
اللي بيمشي بسرعة بيلف لفة زيادة في الآخر عن اللي بيمشي بطيء
(تختلف عدد اللفات على حسب المكان و المسافة)
عشان كده مستعجلين
بس أنا شايفهم مستحمرين اكتر ماهما مستعجلين …
Friday, July 17, 2009 at 8:35 pm
ما انا كنت حموت و ابقى ذكرى فعلا من كام يوم بسبب دول ..
انا بعدي الشارع .. هو جاي بسرعه .. انا بخاف من تعديه الشارع .. هو لسه جاي بسرعه .. انا م الرعب تنحت ف وسط الشارع .. هو “انتي مجنونه ؟”
انا قلبي كان حيقف ..
مع اني اكيد مش مجنونه لكن انا خفت و تنحت ف نص الشارع م الرعب ..
ربنا يستر
Sunday, July 19, 2009 at 1:36 pm
طيب احمدي ربنا انها جت على كلمة “انتي مجنونة” بس ..
انا سمعت شتايم اسخم من كده بكتير!
ربنا يكون في عونا و نبقى احنا الأسرع دايما
Saturday, July 18, 2009 at 10:55 pm
عادى عادى
انا متعوده على كدا
الميكورباصات كلها كدا بتاخد الطريق من المحله للمنصوره فى ربع ساعه او ثلث ساعه بالكتير
ويا نوصل بدرى يا منوصلش خالص
Sunday, July 19, 2009 at 1:38 pm
كلهم متعلمين في مدرسة واحدة تقريبا
و تقريبا أول أهداف المدرسة انها تطلع ناس انتحاريين
Sunday, July 19, 2009 at 7:52 pm
tayb da MICROBUS faker enta el bus beta3 alex trip ???
kolo keda ya aba …. rabina yeslm
Monday, July 20, 2009 at 1:41 am
اتوبيس ايه اللي قصدك عليه؟
أنا فاكر اني اتفرجت على فيلم رعب واحنا راجعين فعلا …