Alexandria

السلام عليكم و رحمة الله و بركاته!!

النهاردة (اللي هوا 23-4-2009) ده يوم بعد امبارح (اللي هوا 22-4-2009)

(شوية رخامة بقى!!)

أنا مش من النوع اللي بحفظ تواريخ … بس أعتقد ان التاريخ ده هيتحفظ لوحده

امبارح طلعت انا و (بعض من) صحابي رحلة لاسكندرية

احب اغيظ صحابي اللي ماجوش معانا امبارح و أقوللهم ان الرحلة بجد كانت لا توصف …. كانت جامدة جدا جدا جدا

مش عشان اسكندرية بس … لا عشان اللمة بتاعة امبارح دي …. بجد من الأوقات اللي عمري ماهنساها (ان شاء الله)

برنامج الرحلة كان لذيذ

1-القلعة

2-المنتزه

3-المعمورة

4-سان ستيفانو

6-ستانلي

7-محطة الرمل

القلعة كانت الاختيار الأنسب اننا نروحها الأول … رحنا و لفيناها حتة حتة تقريبا و صورنا حاجات كتير هناك

المنتزه بقى … المكان لوحده تحفة بجد الاشجار و المباني اللي في النص و البحر اللي بتطل عليه و حاجات كتيرة جميييييلة جدا

المهم اننا رحنا هناك نلعب بولنج

و الشاشة اللي كان عليها الاسكور فصلت و لعبنا من غير ما نحسب الاسكور

و حصل معانا موقف ظريف جدا جدا واحنا واقفين في المنتزه …

كنا حوالي 8 كده متجمعين … فلقينا عربية جاية و فيها واحد وواحدة … المهم لقيناه وقف جمبنا

و بيسأل (مش فاكر بصراحة كان بيسأل عن ايه)

المهم “بينجو” من غير ما يبصله كده بيقوله “لا متلاقيش هنا”

فالمهم الراجل مشي …

اكتشفنا في الآخر ان اللي كان بيسألنا ده هوا “عماد بعرور” لو عارفينه

تقريبا أول مرة في حياتي أشوفه تكون على الحقيقة مش في صورة

ما علينا

المهم … بعد كده انتقلنا للمعمورة … رحنا نقعد على الشط

الموضوع ماعجبناش اوي… المية شكلها مغري بس احنا ماينفعش ننزل!!

المهم قلعنا الجزم و الشرابات و قلنا نتمشى شوية على المية

شوية بشوية … قلنا نجري!!!

قعدنا نتسابق على الشط و على ما وصلنا للمقر بتاع الكراسي كانت نص هدومنا غرقت

المشكلة تأتي هنا بقى … لما قررنا نروح المول

هههههههه … هنروح غرقانين كده؟!!!! … أنا عن نفسي بجد … مكانتش تفرق معايا … و فعلا … رحنا و أنا نص البنطلون من تحت غامق و من فوق فاتح … اشطة يعني … كويس ان محدش يعرفني في اسكندرية!!

بعد كده رحنا “ستانلي” و كان المكان ممتع جدا … بس المشكلة كانت في تعدية الشارع (مش كده يا ميتو؟!!)

و أخيرا … محطة الرمل!!

انا ماكنتش ضحكت كده بقالي فترة

بس بجد كنا ماشيين في الشارع عاملين نضحك على آخرنا!!

خصوصا ان “إيفان” (اللي هوا أحمد منير) كان معانا

كفاية موضوع الشاي بالبطيخ  ده

المهم اتفسحنا و لعبنا و هيصنا و صورررررررنا و جرينا و عملنا كل اللي نفسنا فيه تقريبا

المشكلة بس ان على آخر الرحلة الواحد كان بدأ يجيله تهيؤات من قلة النوم

بجد مش بهزر … “تهيؤاااات”

بس الحمد لله بجد … كان يوم ممتع!!

ان شاء الله انا هرفع الصور (المسموح بها فقط! ) على الأكاونت بتاعي على

flickr

المشكلة بس ان الواحد مقضيها سفريات اليومين دول

امبارح (المنصورة – اسكندرية – المنصورة)

و النهاردة (المنصورة – القاهرة)

و ربنا يستر

فمش هحط كل الصور دلوقتي

سلااام