معلومات للشعب

السلام عليكم

النهاردة جايب شوية معلومات و اختراعات جامدة جدا هتعجبكوا ان شاء الله

1- لمحبي النظام:

في اختراع جديد اسمه “طابور” تقريبا بيتعمل عشان محدش يظلم حد

على راي جورج عزمي:

بجد البتاع ده جامد جدا

احنا لازم نجيب البتاع ده مصر

نشتري منه الصيني حتى … هيبقى تحفة

2- عربية المشتريات:

ده صندوق فاضي ليه عجل من تحت

بيتحط فيه الحاجات اللي بتشتريها من المحل

عشان يوفر عليك تعبك في الشيل

و بيتزق والله مش بيتشد!!

3- الاشارات:

دي باختصار لمبة صغيرة بتنور و تطفي في يمين او شمال العربية على حسب الجهة اللي العربية هتروحلها

بيستخدمها سائق العربية قبل ما يحود يمين او شمال عشان الناس تعرف هوا رايح في انهي داهية

4- السماعات:

معلش ممكن الاختراعات دي تبقى جديدة على البعض

بس اتمنى انها تعجب الناس و يبدأوا يستخدموها في أقرب وقت

عشان في ناس بتعاني هنا -.-

سلام!!

Who Moved My Cheese?

انا عندي قصة Who Moved My Cheese

من فترة بس للأسف مكنتش لاقي وقت أتوغل فيها

المهم الحمد لله النهاردة خلصتها في الأتوبيس وانا راجع القاهرة

طول الطريق ماقدرتش أشيلها من قدامي ….

بصراحة الكتاب تحفة

و المناقشة اللي في اخره جميلة جدا

بنصح أي حد ماقرأهاش انه يقرأها في أقرب وقت ممكن

اعمل نفسك عبيط

ليه الناس بتحب تتبع اسلوب “اعمل نفسك عبيط” و لما يكون في طابور بياخدوا دور الناس اللي جايين من بدري

 

و ليه برضه الناس مابتحترمش نفسها الا لما الواحد يزعق و يقرب يشتم؟؟

 

و ليييييه كمان الناس مابتتكلمش الا لما حد يبدأ يزعق؟؟

 

الاسئلة دي جت في بالي امبارح لما كنت في طابور محطة اتوبيس القاهرة لما لقيت الناس بتتزاحم قدامي وانا جاي من بدري و بدأت أزعق و الناس بدأت تنصرني و الناس اللي جايين متأخر احترمت نفسها

My First Certification

1- الهبل

2- العبط

3- العربية

التلاتة دول بينهم عامل مشترك قوي جدا وهوا:

ان التلاتة بيتساقو

بما اني مبقتش اعرف اقعد على الجهاز الايام دي

فقلت استغل الوقت الضايع ده في حاجة مفيدة

و النهاردة (اللي هوا 1-10-2009) … كان نتيجة الحاجة المفيدة دي

الحمد لله اخدت رخصة القيادة النهاردة و  بعد عناء من طوابير ملهاش لازمة

بس الحمد لله ولا واسطة ولا بطيخ ولا دفع فلوس في الفاضي ولا رشاوي ولا اي حاجة

بركة دعاء الوالدين و كل الحبايب اللي قلتلهم اني ناوي ع الرخصة قريب

و بركه الكوتشي اللي اخويا جايبهولي هدية

انا عارف ان واحد صحبي ممكن يرتكب فيا جريمة بعد ما يشوف البوست ده

بس ربنا يعينك انت كمان و تاخدها في اقرب فرصه

بكده الحمد لله نفذت جزء كبير من الخطة اللي كنت ناويها في الأجازة دي

ماعدا شوية اجزاء حكمت عليا الظروف اني ماكملش فيها

النِمَر الجديدة

السلام عليكم

ظهر من فترة شكل جديد لأرقام العربيات هنا في مصر

الأرقام الجديدة تشبه اللي في الكاريكاتير اللي فوق كده

انا بقالي فترة بجمع الحروف دي … و لقيت انه من الممتع اني احطهم في بوست هنا

الحروف الجديدة دي زي:

س هـ ر —> كفاية عليه كده سيبوه ينام شوية

ل ع —> حزب معارضة صعيدي حضرتك؟؟

ق ر ب —> قرب مني ارجووك

ب ع د —> رجعت في كلامي .. بعد عني احسن

ب ط أ —> بسرعة شوية يا عم

ن ق ط —> تقريبا في شتيمة مكان النقط

ن أ ط —> بينقطني الواد ده

ف ط ر —> شفتها في رمضان …

م ج —> عربية بتستهبل عاملالي فيها كباية

ب ر ع —> ربنا يخليله البراعة بتاعته

ف ر ص —> مش عارف مش عايز ينتهزها ليه

س ق ر —> أعوذ بالله من نار سقر

م و ج —> تقريبا العربية برمائية

ج و —> حر جدا بصراحة

م ص ر —> وطني اوي ياخويا!

ق ع د —> ماهو اكيد مش هيسوق وهوا واقف

د هـ ب —> العربية عيار 24

ص ع ب —> ربنا يسهلك

س ج ع —> ماشاء الله شاعر عظيم

و س ط —> خير الأمور الوسط

س ق ط (و برضه ر س ب) —> ربنا ينجحه ..

ج د —> ربنا يخليلك احفادك

ع و —> خضيتني يا معفن!

ط أ —> حد قالك اني زعلان؟

هـ ب —>العربية بتنط بدال ما تمشي زي غيرها

و ل ع —> لو شفت الحروف دي اتصل بالمطافي

د ل أ —> مش عيب تدلؤ المية كده؟

ق ص ب —> بيتوحم ياعيني!

و آخر حاجة لسه شايفها امبارح و قعدت اضحك طول الطريق …

هـ ف أ —> بصراحة صاحبها صعب عليا!

كفاية كده المرة دي

لقيت من شوية بلوج بيجمع الأرقام دي

و فيه تفصيل الحروف و الأرقام لكل محافظة